Madaxweyne Xasan Sheekh ayaa sheegay in Muqdisho ay isku dayday inay dib u hagaajiso xiriirka Imaaraadka, isla markaana ay sii wadi doonto dadaallada lagu xallinayo khilaafka. Waxa uu sidoo kale qiray taageeradii Imaaraadku hore ugu fidin jiray Soomaaliya, gaar ahaan dhinaca amniga, taas oo uu ku tilmaamay qayb muhiim ah oo ka mid ahayd xiriirkii dhowaa ee labada dal.
“Weli xiriir ayaan la leenahay Imaaraadka, xiriirka ma aanan jarin. Safaaraddeennu halkaas ayay ku taallaa, safaaraddooduna halkan ayay ku taallaa. Laakiin waxaan baabi’inay dhammaan heshiisyadii naga dhexeeyay, kuwaas oo intooda badan ahaa heshiisyo dhinaca amniga iyo ciidamada ah,” ayuu yiri Xasan Sheekh, sida lagu soo xigtay warbixin laga qoray wareysiga.
Khilaafka ayaa sidoo kale sii xoogaystay kadib dhacdooyin la xiriiray Yemen. Soomaaliya waxay sheegtay inay baaritaan ku sameysay adeegsiga aan la fasixin ee hawadeeda iyo garoomadeeda, iyadoo arrintaas ay ku xirtay dhaqdhaqaaqyo la xiriiray siyaasi reer Yemen ah. Mas’uul sare oo Soomaali ah ayaa sheegay in dhacdadaasi ay ka mid ahayd sababihii keenay in la baabi’iyo heshiisyadii Imaaraadka.
Inkasta oo heshiisyadii la baabi’iyay, hadalladii ugu dambeeyay ee Xasan Sheekh waxay muujinayaan in Muqdisho ay dooneyso in albaabka diblomaasiyadda uu furnaado, isla markaana aysan dooneyn in khilaafku isu beddelo xiriir gebi ahaanba go’a. Madaxweyne Xasan Sheekh ayaa sheegay in Soomaaliya ay danaynayso dib u soo celinta xiriirka, iyadoo ilaalinaysa madax-bannaanideeda iyo danaha qarankeeda.
Khilaafka ayaa sidoo kale muujiyay kala aragti duwanaanshaha ka jira nidaamka federaalka Soomaaliya, iyadoo maamulo xiriir dhow la leh Imaaraadka ay ka horyimaadeen go’aankii Muqdisho ay ku baabi’isay heshiisyada.
