Dalalka ciidamada ku biiriya howlgalka Midowga Afrika ee Taageerada iyo Xasilinta Soomaaliya (AUSSOM) ayaa walaac ka muujinaya in khilaafaadka siyaasadeed ee Soomaaliya uu caqabad ku noqon karo qorshaha amni ee dalka, xilli howlgalka uu wajahayo hubanti la’aan ku saabsan mustaqbalkiisa.
Dalalkan oo dhawaan isugu yimid shir degdeg ah oo ka dhacay Kampala ayaa doonaya in dowladda Soomaaliya ay qaaddo tallaabooyin lagu furayo wadahadal siyaasadeed oo loo dhan yahay, si loo yareeyo khilaafaadka u dhexeeya dowladda federaalka iyo dhinacyada kale ee siyaasadda, loona abuuro jawi u saamaxaya in mas’uuliyadda amniga si tartiib ah loogu wareejiyo ciidamada Soomaaliyeed.
Dalalka ciidamada ku biiriya AUSSOM ee ku shiray magaalada Kampala, ayaa doonaya in dhinaca siyaasadda lagu daro qorshaha mustaqbalka howlgalka Midowga Afrika ee Soomaaliya.
Madaxweyne Xasan Sheekh Maxamuud ayaa ka horyimid in arrimaha siyaasadda gudaha Soomaaliya lagu daro caqabadaha AUSSOM.
Madaxweynaha Soomaaliya ayaa ku adkeystay in khilaafaadka siyaasadeed ee dalka ay yihiin arrimo ay tahay in Soomaalidu iyadu xalliso, isaga oo sheegay in shirka Kampala uu diiradda saaro amniga iyo mustaqbalka howlgalka AUSSOM.
Khilaafka siyaasadeed ee Soomaaliya ayaa kusoo beegmaya xilli AUSSOM ay wajahayso caqabado dhaqaale iyo kuwo dhinaca saadka ah, marka uu dhammaado taageerada Xafiiska Taageerada Qaramada Midoobay ee Soomaaliya (UNSOS) dhammaadka December 2026.
