Dowladda Suudaan ayaa si kulul u diidday cunaqabatayn cusub oo uu Mareykanku saaray, taas oo dhaqan gashay Isniintii, iyadoo ku tilmaantay eedeymaha sheegaya in ciidamadeedu adeegsadeen hub kiimiko ah kuwo aan sal iyo raad toona lahayn, isla markaana ka codsatay Washington inay soo bandhigto caddeymo lagu kalsoonaan karo. Cunaqabatayntan ayaa dhaqan gashay kadib markii Mareykanku uu sheegay in Suudaan ay ku guuldareysatay inay u hoggaansanto shuruudaha Xeerka Xakamaynta Hubka Kiimikada iyo Bayoolojiga iyo Ciribtirka Dagaalka, muddadii saddexda bilood ahayd ee loo qabtay.
Tallaabooyinka cusub ayaa xaddidaya inta badan gargaarka dhaqaale iyo farsamo ee Suudaan ka heli jirtay hay’adaha maaliyadeed ee caalamiga ah, marka laga reebo gargaarka bani’aadannimada iyo cuntada. Sidoo kale, waxaa la adkeeyay xayiraadaha saaran dhoofinta badeecadaha iyo tiknoolajiyadda Mareykanka, iyadoo cunaqabataynta la filayo inay sii jirto ugu yaraan hal sano haddii aan la caddeyn in Suudaan ay buuxisay shuruudaha looga qaadayo.
Wasaaraddu waxay sheegtay in Suudaan ay weli ka go’an tahay fulinta waajibaadka ka saaran Heshiiska Mamnuucidda Hubka Kiimikada (Chemical Weapons Convention), isla markaana ay sii waddo wada-shaqeynta ay la leedahay Ururka Mamnuucidda Hubka Kiimikada (OPCW). Waxay intaas ku dartay in dalka uusan horumarin, haysan ama adeegsan hub kiimiko ah, isla markaana uu hadda xubin ka yahay Golaha Fulinta ee OPCW.
Khartuum ayaa sidoo kale sheegtay inay Mareykanka kula macaamishay arrintan waddooyin farsamo iyo habraacyada heshiiska, balse ay ku eedeysay Washington inay ku guuldareysatay soo bandhigista caddeymo lagu kalsoonaan karo, isla markaana ay ka tallaabsatay habraacyadii xaqiijinta ee uu dhigayo heshiiska ka hor inta aysan cunaqabataynta ku soo rogin.
Dowladda Suudaan ayaa ku doodday in tallaabooyinka Mareykanka ay salka ku hayaan ujeeddooyin siyaasadeed halkii ay ka ahaan lahaayeen walaac dhab ah oo la xiriira ka hortagga hubka kiimikada, waxayna ugu baaqday Washington inay soo bandhigto caddeynta ay sheeganeyso inay haysato.
