Xukuumadda Somaliland ayaa si adag uga hadashay hadal kasoo yeedhay Garyaqaan Guuleed Axmed Dafac oo ku saabsanaa qorshaha la sheegay in Somaliland safaarad uga furanayso magaalada Qudus ee laysku haysto, iyadoo masuuliyiinta Somaliland ay sheegeen in tallaabo sharci ah laga qaadi doono cid kasta oo ay ku eedeeyaan inay kasoo horjeeddo arrintan.
“Inan yar oo Hargaysa jooga, oo cida uu u shaqeeyo aanu naqaano oo cadowga u adeega, afar xaraf TV-ga inta uu la fadhiisto qodobo anaga nooga sheekayn maayo, tallaabo cad ayaa laga qaadaya, sharciga ayaa la marinaya, loo dulqaadan maayo,” ayuu yidhi Wasiir Sandheere, isagoo intaas ku daray in cid kasta oo arrimahaasi ku lug leh lala tiigsan doono sharciga.
Garyaqaan Guuleed Axmed Dafac ayaa dhankiisa jawaab ka bixiyay hadalka wasiirka, isagoo sheegay in inkasta oo uu wasiirku adeegsaday luuqad adag, haddana uu aaminsan yahay in doodaha siyaasadeed lagu xalliyo si waafaqsan dastuurka iyo xorriyadda hadalka. Waxa uu sheegay inuu yahay muwaadin reer Somaliland ah oo taageersan dastuurka iyo jiritaanka Somaliland.
