Wasiirka Arrimaha Dibadda, Iskaashiga Caalamiga ah iyo Muwaadiniinta Dibadda ee Masar, Badr Abdelatty, ayaa mar kale xaqiijiyay taageerada buuxda ee dalkiisa u hayo midnimada, madaxbannaanida iyo wadajirka dhuleed ee Soomaaliya, kadib wada hadal telefoon oo uu la yeeshay dhiggiisa Soomaaliya, Cabdisalaan Cali, Talaadadii.
Abdelatty ayaa si cad u muujiyay diidmada adag ee Masar ka qabto tallaabo kasta oo hal dhinac ah oo wax u dhimi karta madaxbannaanida ama midnimada dhuleed ee Soomaaliya.
Labada wasiir ayaa ka wada hadlay xaaladihii ugu dambeeyay ee Soomaaliya, iyo sidoo kale sidii loo xoojin lahaa xiriirka laba geesoodka ah iyo iskaashiga labada dal.
Wasiirka Masar ayaa ammaanay horumarka sii kordhaya ee xiriirka Masar iyo Soomaaliya, isaga oo dib u xaqiijiyay sida dalkiisu uga go’an tahay taageero dhinacyada siyaasadda, amniga iyo dhisidda awoodda hay’adaha, gaar ahaan barnaamijyada tababarrada qaranka.
Sidoo kale wuxuu carrabka ku adkeeyay muhiimadda ay leedahay in la helo maalgelin joogto ah oo lagu taageero howlgalka Midowga Afrika ee Soomaaliya si uu si hufan u gutto waajibaadkiisa.
Abdelatty ayaa cambaareeyay tallaabo uu sheegay inay qaaday Israa’iil oo ku saabsan aqoonsiga waxa loogu yeero “Somaliland,” isagoo ku tilmaamay mid si cad uga hor imaaneysa sharciga caalamiga ah, Axdiga Qaramada Midoobay iyo mabaadi’da aas-aaska Midowga Afrika.
Dhankiisa, wasiirka arrimaha dibadda Soomaaliya ayaa warbixin ka bixiyay xaaladda gudaha iyo dadaallada lagu xoojinayo amniga iyo hay’adaha dowladda, isagoo uga mahadceliyay Masar taageeradeeda joogtada ah.
