Waxaa maanta si rasmi ah u dhammaaday muddo-xileedkii afarta sano ee Baarlamaanka 11-aad ee Jamhuuriyadda Federaalka Soomaaliya, iyadoo dalka uu galay marxalad siyaasadeed oo aad u xasaasi ah.
Inkasta oo waqtiga Baarlamaanka uu idlaaday, haddana Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa u harsan muddo ku dhow hal bil oo ka mid ah muddo-xileedkiisa, taasoo sii kordhinaysa xiisadda siyaasadeed ee dalka.
Xaaladdan ayaa kusoo beegmaysa xilli dowladda federaalku ay hore u meelmarisay isbeddel dastuur oo muran badan dhaliyay, kaas oo dhigaya in muddo-xileedka hay’adaha dowladda laga dhigo shan sano. Arrintan ayaa si weyn loogu kala aragti duwan yahay dhinacyada siyaasadda.
Siyaasiyiinta mucaaradka ah, oo ay garab taagan yihiin qaar ka mid ah maamul goboleedyada sida Puntland iyo Jubbaland, ayaa sheegay in Baarlamaanku si rasmi ah u dhammaaday, waxayna ku baaqeen in la kordhiyo cadaadiska caalamiga ah ee lagu doonayo in lagu gaaro doorasho lagu wada qanacsan yahay.
Mucaaradku waxay ku adkaysanayaan in tallaabo kasta oo ka baxsan waqtiga dastuuriga ah ay tahay mid sharci-darro ah, taasoo sii kordhin karta khilaafka u dhexeeya dowladda iyo mucaaradka.
Dhanka kale, Xasan Sheekh Maxamuud iyo Dowladda Federaalka Soomaaliya ayaa diiradda saaraya qorshe doorashooyin dowlad goboleedyo ah oo laga hirgeliyo Koonfur Galbeed, Galmudug iyo Hirshabeelle, kuwaas oo ay u arkaan tijaabo lagu gaari karo doorasho toos ah oo qof iyo cod ah heer federaal.
Ilo xog-ogaal ah ayaa sheegaya in mucaaradku ay qorsheynayaan shirar siyaasadeed oo ay ku yeeshaan magaalada Gaalkacyo, halkaas oo ay kaga tashan doonaan tallaabooyinka xiga, inkastoo ay jiraan warar sheegaya in kala aragti duwanaan gudaha ah ay saameyn ku yeelatay isku dubbaridka mucaaradka.
Waxaa sidoo kale la sheegay in xaaladda Muqdisho ay u socoto si kacsan, iyadoo dhinacyadu ay isha ku hayaan tallaabo kasta oo lagu xallin karo khilaafka sii xoogeysanaya.
Guud ahaan, Soomaaliya waxay wajahaysaa marxalad kala-guur siyaasadeed oo adag, iyadoo beesha caalamka iyo shacabka Soomaaliyeed ay sugayaan xal siyaasadeed oo horseeda xasillooni iyo heshiis wadajir ah.
