Ciidamada dowladda Soomaaliya oo kaashanaya kuwa degaanka ayaa u jiheystay xoreynta degmooyinka Ceelbuur, Wabxo iyo Galhareeri ee Gobolka Galgadud, halkaas oo 10-kii sano ee la soo dhaaay ay gacanta ku hayaan Ururka Al-Shabaab.
Ciidamada oo wata Gaadiidka dagaalka iyo hubka noocyadiisa kala duwan ayaa ka kala baxay Magaalooyinka Dhuusamareeb oo katirsan Gobolka Galgaduud iyo degmada Maxaas oo katirsan Gobolka Hiiraan.
Madaxweynaha Soomaaliya Xasan Sheekh Maxamuud oo ku sugan Magaalada Dhuusamareeb ayaa sheegay in Ciidamada dowladda iyo kuwa degaanka ee Macawiisleyda ay howlgallada billaabeen, isla markaana laga xoreyn doono Al-Shabaab degaannada ay ka joogaan Galmudug.
Wuxuu sheegay in howlgalka wajigii koowaad lagula wareegay degaano dhowr ah, isla markaana uu rajeeynayo in wajiga labaad lagula wareego degaannada iyo degmooyinka ay weli kaga harsan yihiin Gobolada dalka.
