Guddoomiyaha Golaha Shacabka Soomaaliya, Aadan Maxamed Nuur (Aadan Madoobe), ayaa ku guuleystay doorashada madaxtinimada Dowlad Goboleedka Koonfur Galbeed, kadib codbixin ay sameeyeen xildhibaannada baarlamaanka maamulkaasi.
Sida ay shaacisay Guddiga Doorashooyinka, Aadan Madoobe ayaa helay 88 cod, halka musharraxii la tartamayay, Cabdicasiis Maxamed Jawaari, uu helay hal cod oo keliya.
Kadib markii lagu dhawaaqay natiijada, Aadan Madoobe ayaa u mahadceliyay xildhibaannada codkooda siiyay, isagoo ballanqaaday inuu mudnaanta siin doono mideynta bulshada, dib-u-heshiisiinta iyo xoojinta hannaanka dimuqraadiyadeed ee Koonfur Galbeed.
“Waxaan uga mahadcelinayaa xildhibaannada kalsoonida ay i siiyeen. Waxaan xoogga saari doonaa midnimada shacabka, dib-u-heshiisiinta iyo dhismaha hay’ado dimuqraadi ah oo xooggan,” ayuu yiri.
Doorashadan ayaa si weyn isha loogu hayay, iyadoo lagu tilmaamay mid saameyn ku yeelan karta jihada siyaasadeed ee Koonfur Galbeed iyo guud ahaan Soomaaliya.
