Muqdisho ayaa gashay jawi siyaasadeed oo aad u kacsan, iyadoo si weyn looga dareemayo dhaq-dhaqaaqyo ciidan iyo abaabul siyaasadeed oo ay wadaan dowladda Federaalka Soomaaliya iyo Madasha Mucaaradka Soomaaliyeed, kahor bannaanbaxyo la qorsheeyay in 6-da June lagu qabto caasimadda.
Wararka laga helayo magaalada ayaa sheegaya in hoggaamiyeyaasha mucaaradka qaarkood ay dageen xaafado ka tirsan degmooyinka Gobolka Banaadir, halkaas oo ay ka wadaan abaabulka bannaanbaxyada iyo kulamo siyaasadeed oo la xiriira qorshahooda.
Ra’iisul Wasaarihii hore ee Soomaaliya Xasan Cali Kheyre ayaa la sheegay inuu ka baxay xayndaabka garoonka diyaaradaha Muqdisho, isagoo degay agagaarka degmada Howlwadaag. Waxaa sidoo kale saaka la arkayay ciidamo iska soo horjeeda oo isku horfadhiya Isgoyska Dabka, halkaas oo la sheegay inuu ku sugan yahay Kheyre iyo xubno la socda.
Dhanka kale, xaafadda Mirinaayo ayaa laga dareemayaa dhaqdhaqaaqyo siyaasadeed oo uu wado Madaxweynihii hore Shariif Sheekh Axmed, taasoo muujinaysa sare u kaca dhaq-dhaqaaqyada mucaaradka.
Dowladda Federaalka Soomaaliya ayaa iyaduna kordhisay feejignaanta amni, iyadoo ciidamo badan la dhigay waddooyinka muhiimka ah ee magaalada Muqdisho, si looga hortago xaalado amni darro iyo rabshado ka dhasha bannaanbaxyada la qorsheeyay.
