Dowladda Federaalka Soomaaliya ayaa beenisay warar sheegayay in loo yeeray safiirkeeda dalka Kenya, Jibriil Ibraahim Cabdulle, kadib markii uu ka qaybgalay shir ganacsi iyo beeraha la xidhiidha oo lagu qabtay magaalada Nayroobi, kaas oo uu daahfuray safiirka Israa’iil ee Kenya.
Muranka ayaa dhashay kadib markii Safaaradda Israa’iil ee Kenya ay baahisay qoraal ay ku sheegtay in safiirkeeda, Gideon Behar, uu furay shirka Avocado Africa 2026, arrintaas oo dhalisay hadal-heyn ku saabsan joogitaanka wakiillo ka socday Soomaaliya iyo Israa’iil hal madal.
Safiir Jibriil Ibraahim Cabdulle ayaa isaguna sheegay in ka qaybgalka Soomaaliya uu qeyb ka ahaa dadaallada diblomaasiyadda dhaqaalaha, isaga oo xusay in ujeeddadiisu ahayd soo bandhigista fursadaha maalgashi iyo ganacsi ee Soomaaliya.
Wuxuu tilmaamay in khudbaddiisa uu diiradda ku saaray horumarka dhaqaalaha Soomaaliya, fursadaha ka jira beeraha, kalluumeysiga, dekedaha, tamarta iyo maalgeshiga ganacsiga gaarka loo leeyahay.
Sawirro lagu baahiyay baraha bulshada iyo warbaahinta ayaa muujiyay Safiirka Soomaaliya ee Kenya, Jibriil Ibraahim Cabdulle, iyo Safiirka Israa’iil ee Kenya, Gideon Behar, oo wada taagan intii uu socday shirku.
Muuqaalka labada safiir ayaa soo jiitay indhaha dad badan maadaama uu kusoo beegmay xilli xidhiidhka u dhexeeya Soomaaliya iyo Israa’iil uu marayo heerkii ugu xumaa sannadihii u dambeeyay, kadib markii Dowlada Soomaaliya ay ka hor timid aqoonsiga Israa’iil siisay Somaliland.
