Wasiirka Caafimaadka ee Kenya Aadan Barre Duale ayaa mar kale ku baaqay in dib loo furo xadka u dhexeeya Kenya iyo Soomaaliya, isagoo sheegay in xirnaanshaha muddada dheer uu yahay mid aan si buuxda u shaqayn isla markaana dowladda ka hor istaagaya dakhli iyo kormeer rasmi ah.
“Xadka wuxuu u abuuri karay dowladda dakhli wanaagsan, hay’adaha socdaalkana waxay heli lahaayeen fursad ay dadka si sax ah u hubiyaan. Laakiin hadda waxaad leedahay xadku waa xiran yahay, balse taas warqad ayay ku qoran tahay oo keliya,” ayuu yiri.
Wasiirka ayaa sidoo kale sheegay inuu arrintan kala hadlay Madaxweynaha Kenya William Ruto, isagoo muujiyay rajo ah in si rasmi ah dib loogu furi doono goobaha laga gudbo xadka.
“Waxaan rabnaa in xadka la furo, waxaanan sii wadi doonaa wadahadalka aan la leeyahay Madaxweynaha,” ayuu intaas ku daray.
