Taliyaha Ciidanka Xoogga Dalka Soomaaliyeed, Brig. Gen. Ibraahim Maxamed Maxamuud, ayaa dalacsiiyay ciidamadii ka qeyb qaatay howlgalkii lagu furay waddada muhiimka ah ee isku xirta Muqdisho iyo Baydhabo, taas oo muddo 14 sano ah ay Al-Shabaab xanibtay.
Taliyaha oo cutubyo ka tirsan ciidanka kula hadlayay magaalada Baydhabo ayaa ku bogaadiyay guusha ay ka gaareen howlgalkaas, isagoo sheegay in cadowgu dhibaato weyn ku hayay shacabka safra waddadaas. Wuxuu xusay in guusha ay tahay mid ay ku farxeen dhammaan shacabka Soomaaliyeed, isla markaana loo baahan yahay in la xoojiyo amniga deegaannada ay ciidamadu la wareegeen.
Ibraahim Maxamed Maxamuud ayaa ciidanka ku abaalmariyay min hal darajo oo dalacsiin ah, isagoo ballan qaaday in saraakiishii iyo saraakiil-xigeennadii hoggaaminayay howlgalkaas ay sidoo kale heli doonaan dalacsiin la mid ah.
“Waxaan si qalbi ah idiinka mahadcelinayaa. Inta aan awoodo, hal darajo ayaan idin dalacsiiyay, sidoo kale saraakiisha idin hoggaamineysay iyagana ballan la mid ah ayay leeyihiin,” ayuu yiri Taliyaha.
Wuxuu intaas ku daray: “Waddada dheer ee isku xirta Muqdisho iyo Baydhabo, oo ay isbaaro u tiillay Khawaarijtu tan iyo 2009, inaad ka xoreyseen, aadna sii daba-joogtaan firxadkooda waad ku mahadsan tihiin guushaas weyn ee aad u soo hooyseen Qarankiinna.”
Dowladda Soomaaliya ayaa horay u shaacisay in dib loo furay waddada dheer ee Muqdisho iyo Baydhabo, kaddib dagaallo culus oo ka dhacay deegaanka Daynuunaay ee gobolka Bay, halkaas oo jab xooggan lagu gaarsiiyay Alshbaaab sida ay Dowladdu sheegtay.
