Madaxweynaha Dowladda Federaalka Soomaaliya, Xasan Sheekh Maxamuud, ayaa gaaray magaalada Arusha ee dalka Tanzania, halkaas oo uu kaga qayb galayo Meertada 25-aad ee Shir madaxeedka sanadlaha ah ee Madaxda Ururka Bulshada Bariga Afrika (EAC).
Sida ay sheegtay madaxtooyada Soomaaliya, Madaxweyne Xasan Sheikh ayaa kulanka ka jeedin doona khudbad diiradda lagu saaray xoojinta iskaashiga gobolka ee dhinacyada dhaqaalaha, amniga, ganacsiga iyo isku xirka bulshooyinka dalalka xubnaha ka ah Ururka.
Waxa kale oo madaxweynuhu uu kulamo doceedyo la yeelan doonaa madaxda kale ee ka qayb galaya shirka, iyada oo la filayo in laga wada hadlo arrimaha amniga gobolka, gaar ahaan la dagaallanka argagixisada iyo horumarinta ganacsiga xuduudaha.
Shirka sanadlaha ah ee EAC ayaa sanadkan lagu falanqeynayaa ajandayaal ay ka mid yihiin xoojinta iskaashiga dalalka gobolka, horumarinta dhaqaalaha, iyo siyaasadda gobolka, iyadoo la isku dayayo in la helo habab cusub oo lagu xoojinayo isku xirnaanta ganacsi iyo mid bulsho ee dalalka xubnaha ka ah Ururka.
Soomaaliya ayaa si rasmi ah u noqotay xubinta 8‑aad ee Ururka Bulshada Bariga Afrika 4 March 2024, kaddib markii ay soo gudbisay heshiiska ku biirista Ururka. Tan ayaa xaqiijinaysa in Soomaaliya ay hadda ka qeyb qaadan karto dhammaan howlaha iyo barnaamijyada EAC.
Dowladda Soomaaliya ayaa dhawaan bilowday soo saarista baasaboor cusub oo EAC, si ay u fududeyso isu socodka dadka Soomaaliyeed ee dalalka xubnaha ka ah ururka, taas oo ah tallaabo muhiim u ah isdhexgalka gobolka.
