Madaxweynihii hore ee Soomaaliya, Sheekh Shariif Sheekh Axmed, ayaa war-saxaafadeed kasoo saaray xaaladda siyaasadeed ee ka taagan Baarlamaanka Federaalka Soomaaliya, isaga oo si adag u cambaareeyay khilaafka iyo buuqa hareeyay fadhiyada golaha.
Sheekh Shariif ayaa ku tilmaamay waxa ka socda Baarlamaanka “mas’uuliyad-darro”, isaga oo xusay in golaha uu yahay muraayadda qaranka, lagana doonayo inuu ilaaliyo hannaanka dowlad-dhiska iyo sharciyadda dalka.
Madaxweynihii hore ayaa sidoo kale Madaxweynaha Soomaaliya, Xasan Sheekh Maxamuud, ugu baaqay inuu ka fogaado ku tumashada sharciga iyo ku takri-falka awoodda, isla markaana uu dhowro heshiisyada siyaasadeed iyo dastuurka dalka.
War-saxaafadeedka ayaa lagu muujiyay in xisaabtanka, isla-xisaabtanka iyo daah-furnaantu ay yihiin tiirarka dowladnimo, ayna lagama maarmaan tahay in laga ilaaliyo faragelin siyaasadeed ama dano gaar ah.
Sheekh Shariif ayaa waxa uu baaq u diray dhammaan dhinacyada ay khusayso in si wadajir ah loo ilaaliyo midnimada, sharciyadda iyo hay’adaha dowliga ah, isla markaana xal waara laga gaaro khilaafka Baarlamaanka, si looga fogaado dib-u-dhac ku yimaada geeddi-socodka dowlad-dhiska dalka.
