Mas’uuliyiinta dowladda Mareykanka ayaa sheegay in dad ay ku jiraan Soomaali lagu xiray magaalada Minneapolis intii lagu guda jiray hawlgal baaxad leh oo ka dhan ah dadka aan haysan dukumentiyada socdaalka, iyadoo arrintu ay dhacday laba maalmood kadib markii Madaxweyne Donald Trump uu aflagaado u jeediyay muhaajiriinta ka soo jeeda Geeska Afrika, gaar ahaan Soomaaliya, isla markaana uu sheegay inuu doonayo dalka in laga saaro.
Wasaaradda Amniga Gudaha Mareykanka ayaa sheegtay in qabqabashadu ay bilaabatay Isniintii, waxayna soo bandhigtay warbixin kooban oo ku saabsan 12 qof oo la xiray — shan ka mid ah waa Soomaali, kuwa kalena waxay ka kala yimaadeen Mexico iyo El Salvador. Mas’uuliyiinta ayaa ku tilmaamay dhammaan dadka la qabtay “dambiilayaal khatar ah,” iyagoo sheegay in dembiyadoodu ay kala ahaayeen khiyaano, xatooyo gaari, falal kufsi iyo wadis gaari iyagoo maandooriye isticmaalay.
Duqa magaalada Minneapolis, Jacob Frey, oo ka tirsan Xisbiga Dimoqraaddiga, ayaa si adag u cambaareeyay weerarrada afka ah ee Trump uu ku qaaday bulshada Soomaaliyeed ee magaalada. Khamiistii, ayuu Jacob Frey ugu baaqay dhammaan madaxda Maraykanka “inay jaceyl iyo ixtiraam u muujiyaan” bulshada Soomaaliyeed ee Minnesota, taas oo ah tan ugu weyn ee ku nool Waqooyiga Ameerika.
Hadallada Trump ee cunsuriyadda ah ee lagu bartilmaameedsanayo Soomaalida — iyo weerarrada uu ku hayo siyaasiyiinta Minnesota ee difaaca bulshadaas — waxaa si xoog leh u bogaadiyay xulafadiisa siyaasadeed.
Talaadadii, intii lagu guda jiray kulan golaha wasiirrada, Trump ayaa ka falceliyay warbixinno ku saabsan musuqmaasuq ka dhex jira qaybo ka mid ah bulshada Soomaaliyeed ee Minnesota, isaga oo ku tilmaamay qaar ka mid ah muhaajiriinta “qashin” isla markaana sheegay inuu doonayo “in dib loogu celiyo meeshii ay ka yimaadeen.”
Bulshada Soomaaliyeed ee Minnesota — oo ah qayb muhiim ah oo si qoto dheer ugu dhex milantay dhaqanka, shaqada, ganacsiga iyo horumarka gobolka — ayaa hadda wajahaysa cabsi sii kordheysa oo ku saabsan sida siyaasadda Trump ay saameyn karto mustaqbalkooda.
