Madaxweynaha ayaa sheegay in dowladda iyo shacabka Soomaaliyeed ay ka xun yihiin khasaarihii nafeed iyo burburka hantiyeed ee ka dhashay roobabka daadadka wata ee ku dhuftay gobollo badan oo ka tirsan Pakistan, gaar ahaan gobolka Khyber Pakhtunkhwa.
Madaxweynuhu wuxuu intaas ku daray in Soomaaliya ay garab taagan tahay Pakistan, xilli ay wajahayaan masiibo dabiici ah oo ay sababeen isbeddelada cimilada.
Fatahaadaha ayaa yimid kadib roobab mahiigaan ah oo ay la socdaan daadad degdeg ah, kuwaas oo sababay dhul-gariirro, dumista dhismayaal, iyo in ay go’doon noqdaan tuulooyin badan.
Shaqaalaha gurmadka degdegga ah ayaa ku howlan bixinta gargaar, iyadoo saraakiisha cimilada ay ka digeen roobab dheeraad ah oo soo socda.
Saynisyahannada cimilada ayaa tilmaamay in kuleylka adduunka uu kordhiyay roobabka mahiigaanka ah, taas oo sii xoojisay saamaynta fatahaadaha, Pakistan oo horey u wajahday fatahaado ba’an sanadkii 2022, ayaa weli ka mid ah dalalka ugu nugul ee uu saameeyo isbeddelka cimilada.
