Dowladda Uganda ayaa si rasmi ah ugu dhawaaqday inay bilowday dhimista iyo ka bixitaanka ciidamadeeda ku sugan Soomaaliya, kuwaas oo muddo ku dhow 20 sano ka qeyb qaadanayay howlgallada amniga ee dalka.
War-saxaafadeed uu maanta oo Isniin ah soo saaray Gaashaanle Sare Chris Magezi, Ku-simaha Agaasimaha Warfaafinta Ciidamada Difaaca Uganda (UPDF), ayaa lagu sheegay in ciidanka Uganda ay bilaabeen ka bixitaanka askartooda Soomaaliya, kuwaas oo ku jooga heshiis laba geesood ah oo ay la galeen Dowladda Federaalka Soomaaliya.
Sida lagu sheegay bayaanka, kooxdii ugu horreysay ee ciidamada Uganda ee qeybta ka ah qorshaha ka bixitaanka ayaa durba dib ugu laabatay dalkooda, iyadoo howlgalka lagu soo afjarayo joogitaanka ciidamadaas la filayo in maalmaha soo socda la dhammaystiro.
Dowladda Uganda ayaa sidoo kale sheegtay inay si tartiib-tartiib ah Soomaaliya ugala bixi doonto dhammaan ciidamadeeda, oo ay ku jiraan kuwa qeybta ka ah howlgalka Midowga Afrika ee Taageerada iyo Xasilinta Soomaaliya (AUSSOM), iyadoo qorshuhu yahay in ka bixitaanka guud la dhammaystiro dhammaadka sannadka 2027.
Tallaabadan ayaa haddii qorshuhu u hirgalo sida lagu dhawaaqay, soo afjari doonta joogitaanka milatari ee Uganda ee Soomaaliya oo socday muddo ku dhow labaatan sano, tan iyo markii ay ciidamadeedu dalka yimaadeen.
Uganda ayaa ka mid ahayd dalalkii ugu horreeyay ee ciidamo u soo dira Soomaaliya, iyadoo door weyn ku lahayd howlgalladii Midowga Afrika ee AMISOM iyo AUSSOM.
