Shacabka Soomaaliyeed iyo qaar ka mid ah siyaasiyiinta mucaaradka ah ayaa si kulul u dhaliilay tallaabooyinka Dowladda Madaxweyne Xasan Sheekh Maxamuud ee la xiriira iibinta dhismayaal muhiim ah oo ka tirsan hantida guud ee dalka, oo ay ku jiraan xaruntii hore ee Wasaaradda Caafimaadka, Isbitaalka Laansareeti, iyo dhismayaal kale oo taariikhi ah oo ku yaalla caasimadda Muqdisho.
Arrintan ayaa si weyn uga dhex dhalisay dood ku saabsan xurmada ay dowladdu u hayso goobaha daryeelka bulshada iyo ilaalinta hantida qaranka, waxaana si weyn u dhaliiley Xildhibaan Cabdiraxmaan Cabdi Shakuur.
Siyaasiga mucaaradka ah Cabdiraxmaan Cabdishakuur Warsame ayaa bartiisa Facebook ku qoray dhaliil xooggan oo uu u jeediyay dowladda, isagoo ku tilmaamay iibka xarumaha caafimaadka inay yihiin tallaabo muujinaysa in dowladdu ka liidato xagga mooralka iyo mas’uuliyadda xataa marka loo eego maleeshiyaadkii beelaha ee dagaalladii sokeeye.
“Xilliyadii dalku ugu rajada xumaa oo ay dagaalladu daraf kasta ka socdeen, maleeshiyaadka beelaha waxay xurmayn jireen xarumaha caafimaadka, iibinta Wasaaraddii Caafimaadka, Isbitaalka Laansareeti iyo dhismayaalkii dhaxal taariikheedka ahaa waxay caddayn u tahay in maamulka Madaxweyne Xasan Sheekh uu ka mooral, akhlaaq iyo xurmo liito maleeshiyo beeleedkii,” ayuu yiri Cabdiraxmaan Cabdi Shakuur.
Isbitaalka Laansareeti iyo xarumihii kale ee la sheegay in la iibiyay waxay shacabka Soomaaliyeed u ahaayeen meel astaan u ah adeeg caafimaad iyo mid taariikhi, gaar ahaan waqtiyadii dalka uu ku jiray burburka iyo dagaalka.
Dowladda Soomaaliya ayaa horey u sheegtay in ay u baahatay xarumihii hore Dowladda si adeegyo Bulsho loogu sameeyo balse, waxaa walaac xoogan ay dadka ka muujinayaan in illaa iyo hadda aan la arag Xarun Dowladeed oo dadka laga kiciyay oo adeeg Dowladda ay bixiso lagu sameeyo.
