Madaxweynaha Soomaaliya Xasan Sheekh Maxamuud ayaa wareegto uu soo saaray waxaa uu Mudane Maxamed Amiin Sheekh Cusmaan u magacaabay xilka Ku-xigeenka Agaasimaha Guud ee Madaxtooyada Qaranka.
Madaxweyne Xasan Sheekh Maxamuud ayaa Alle uga baryey Agaasime Ku-xigeenka Cusub in uu u fududeeyo masuuliyadda culus ee loo igmaday, isagoona kula dardaarmay in uu si hufan oo daacadnimo leh ugu adeego Qaranka.
Mudane Maxamed Amiin Sheekh Cusmaan Amiin waa aqoonyahan labo shahaado ka haysta heerka 2-aad ee jamaacadda, isaga oo ku takhasusay Horumarinta Dhaqaalaha, Maareynta Nabadda iyo Aammaanka Afrika. Waxa uu hore u soo noqday Sanatar ka tirsan Aqalka Sare ee Baarlamaanka JFS iyo Guddoomiyaha Guddiga Difaaca iyo Amniga ee Golaha Aqalka Sare, sidoo kale waxa uu soo noqday Safiir Ku-xigeenka safaaradda aynu ku leennahay dalka Kenya.
Dhinaca kale Madaxweyne Xasan Sheekh Maxamuud ayaa la-taliyihiisa Amniga Qaranka waxaa uu u Magacaabay Xuseen Macalin oo sidoo kale ah horay u soo noqday la-taliyaha Amniga Qaranka ee Madaxweynihii xilka ka degay ee Maxamed Cabdullaahi Farmaajo, balse markii dambi laga qaaday xilkaas, waxaana Madaxtooyada Soomaaliya soo martay ilaa lix Agaasime dowladdii Maxamed Cabdullaahi Farmaajo.
