Dagaalka oo geystay khasaaro kala duwan ayaa waxaa uu ka dhacay Saldhig Ciidamo ka tirsan kuwa Kenya ee kamid ah AMISOM ku leeyihiin degaanka Hoosingow oo hoostaga degmada Badhaadhe ee Gobolka Jubbada Hoose.
Dagaalka ayaa waxaa uu yimid kadib markii sida la sheegay Xubno ka tirsan Al-Shabaab ay weerareen Saldhiga Ciidamada Kenya ku leeyihiin degaanka Hoosingoow, waxaana halkaasi ka dhacay dagaal in ka badan saacad socday.
Goobjoogayaal ayaa waxaa ay ku warrameen in ay maqlayeen dhawaqa rasaasta ay isku adeegsanayeen labada dhinac, isla markaana uu jiro khasaaro dhaawac ah oo ka dhashay dagaalka, kaas oo kala gaaray labada dhinac.
Xaaladda degaanka Hoosingoow ee Gobolka Jubbada Hoose ayaa degan, waxaana degaankaas uu kamid yahay goobaha ay ku sugan yihiin Ciidamada Kenya lagana ilaaliyo degmada Badhaadhe oo kamid ah degmooyinka Gobolka Jubbada Hoose.
