Dowladda Soomaaliya iyo shirkadda shidaalka ee dowladda Turkiga (TPAO) ayaa sii wada qodista ceelka shidaalka ee Curad-1 ee xeebaha Soomaaliya, iyadoo mas’uuliyiintu sheegeen in natiijooyinka ugu horreeya ee sahminta la filayo dhammaadka sannadkan.
Ceelka ayaa la qorsheeyay inuu gaaro qoto dhan ku dhowaad 7,500 mitir, waxaana qodistiisu socon kartaa ilaa 288 maalmood, taasoo ka dhigaysa mid ka mid ah ceelasha shidaalka badda ee ugu qoto dheer caalamka.
Wasiirka Batroolka iyo Macdanta Soomaaliya, Daahir Shire Maxamed, ayaa sheegay in hawlaha qodista ay socdaan, isla markaana xogtii sahminta ee hore la falanqeeyay, iyadoo hadda diiradda la saarayo baaritaanka ceelka ugu horreeya ee badda Soomaaliya.
Haddii ceelka laga helo kayd shidaal oo ganacsi ahaan loo soo saari karo, waxay noqon doontaa helitaankii ugu horreeyay ee noocaas ah ee Soomaaliya, taasoo wax ka beddeli karta mustaqbalka waaxda tamarta iyo dhaqaalaha dalka.
Si kastaba ha ahaatee, ilaa hadda lama shaacin natiijo muujinaysa in shidaal ganacsi ahaan loo heli karo, waxaana la filayaa in qiimeynta ceelka ay dhammaato marka qodista la soo gabagabeeyo.
