Xiisadda ka taagan Bariga Dhexe ayaa weli ah mid cakiran, iyadoo dadaallada diblomaasiyadeed ee lagu doonayo in lagu soo afjaro dagaalka u dhexeeya Maraykanka, Israa’iil iyo Iran ay weli mugdi ku jiraan.
Dowladda Iran ayaa si cad u sheegtay in ayna geli doonin wax wadahadal ah inta Washington ku hayso “cadaadis iyo hanjabaad,” taas oo muujinaysa in wadahadallada nabadeed ay wajahayaan caqabado waaweyn.
Dhanka kale, Madaxweynaha Maraykanka, Donald Trump, ayaa sheegay in xayiraadda lagu hayo dekedaha Iran ay sii socon doonto ilaa Tehran ay ka aqbasho heshiis, arrintaas oo sii kordhin karta xiisadda gobolka.
Isla mar ahaantaana, wadahadallo kale ayaa la filayaa in ay ka qabsoomaan magaalada Washington DC, halkaas oo wufuud ka kala socota Lubnaan iyo Israa’iil ay ku kulmi doonaan si loo soo afjaro colaadda u dhaxaysa labada dhinac.
Inkastoo ay jirto xabbad-joojin 10 maalmood ah oo u dhaxaysa Lubnaan iyo Israa’iil, haddana Israa’iil ayaa lagu eedeeyay inay sii waddo duqeymaha koonfurta Lubnaan. Weerar dhanka cirka ah oo ka dhacay magaalada Qaaqaaiyet El Jisr ayaa dhaawacay ugu yaraan lix qof, halka guryo lagu burburiyay deegaanka Khiam.
Xaaladda bani’aadamnimo ee gobolka ayaa weli ah mid walaac leh, iyadoo dad badan ay ku barakaceen dagaallada socda, isla markaana uu jiro khasaare naf iyo maalba leh.
Dadaallada caalamiga ah ee lagu doonayo xabbad-joojin rasmi ah iyo heshiis waara ayaa weli socda, hase yeeshee natiijadooda ayaa ah mid aan weli la hubin.
