Warar dheeraad ah ayaa waxaa ay kasoo baxayaan dagaal culus oo degaan ka tirsan Gobolka Jubbada Hoose ku dhex-maray Ciidamada Kenya oo ka tirsan howlgalka Midowga Afrika ee ATMIS & Xubno ka tirsan Ururka Al-Shabaab.
Dagaalka ayaa yimid, kaddib markii sida la sheegay Xubno ka tirsan Al-Shabaab ay weerar ku qaadeen saldhig Ciidamo ka tirsan kuwa Kenya ku leeyihiin deegaanka Taabta oo hoostaga degmada Dhoobleey ee Gobolka Jubbada Hoose, waxaana halkaasi ka dhacay dagaal culus oo la isku adeegsaday hubka noocyadiisa kala duwan.
Saraakiisha Ciidamada Kenya ayaan weli ka hadlin weerarka lagu qaaday, hayeeshee wararkii ugu dambeeyay ee naga soo gaaraya deegaanka Taabta ee Gobolka Jubbada Hoose ayaa waxaa ay sheegayaan in Ciidamada Kenya ay degaankaas ka wadaan dhaq dhaqaaqyo Ciidan maadaama Saldhiga ay ku sugan yihiin la weeraray.
Tan iyo markii howlgallada ka dhanka ah Al-Shabaab ay ka billaawdeen qaar kamid ah Gobolada dalka ayaa waxaa yaraaday weerarada ay Al-Shabaab ka geysan jireen gobolada Jubbooyinka, hayeeshee Maamulka Jubbaland uu sheegay inay dhankooda bilaabi doonaan wajiga labaad ee howlgalka ka dhanka ah Al-Shabaab.
