Madaxweynaha Dowladd goboleedka Puntland Siciid Cabdullaahi Deni ayaa xalay waxaa uu Muqdisho kula kulmay xubnaha Puntland ku metala baarlamaanka Dowladda Federaalka ah ee Soomaaliya.
Madaxweynaha ayaa la wadaagay xubnahan warbixin ku saabsan xaalada guud ee deegaanada Puntland iyo tan Soomaaliya, gaar ahaan marxaladda doorashada ee dalku marayo iyo dadaalka Puntland ugu jirto inay qabsoomto Doorasho la isla ogolyahay oo wakhtigeeda dhacda.
Afhayeenka madaxtooyada Puntland Jaamac Dabaraani oo warbaahinta la hadlay ayaa sheegay in kulanka intiisa badan diirada lagu saaray arimaha doorashooyinka, iyadoona la isku afgartay in xal siyaasadeed laga gaaro doorashada.
Sidoo kale waxaa uu sheegay in madaxweynaha Puntland uu weli kulamo ka wado magaalada Muqdisho, kaasi uu kula qaadanayo siyaasiyiinta iyo qeybaha kala duwan ee bulshada.
