Wasiirka Arrimaha Gudaha ee Dowladda Federaalka Soomaaliya, Cali Yuusuf Cali (Xoosh), ayaa si kulul uga jawaabay khudbad uu Madaxweynaha Puntland Siciid Cabdullaahi Deni ka jeediyay Golaha Wakiillada Puntland, isaga oo ku eedeeyay inuu ka hadlay dano shaqsiyeed halkii uu ka meteli lahaa shacabka Puntland.
Wasiirka ayaa sidoo kale ku eedeeyay Deni inuu dhaawacay wadajirka siyaasadeed ee Puntland, siyaasadeeyay amniga gudaha, isla markaana uu isku dayayo inuu shacabka ka leexiyo su’aalaha ku saabsan waxqabadka maamulkiisa.
“Hogaamiye Siciid uma hadlin shacabka Puntland, balse wuxuu u hadlay damaciisa shaqsiga ah, isagoo Puntland ka dhigaya aalad uu ku difaaco danihiisa gaarka ah.” Cali Yuusuf Cali (Xoosh), Wasiirka Arrimaha Gudaha Soomaaliya.
Wasiir Cali Xoosh wuxuu sheegay in madaxweynaha Puntland uu mararka qaar midnimada Soomaaliya u adeegsado aalad siyaasadeed oo uu ku difaaco danihiisa, isaga oo ku eedeeyay inuu ka baxay heshiisyo hore oo la xiriiray geeddi-socodka dowlad-dhiska Soomaaliya.
Wasiirka Arrimaha Gudaha ayaa ugu dambeyn sheegay in Puntland ay tahay tiir muhiim u ah dowladnimada Soomaaliya, islamarkaana aan loo adeegsan karin dano gaar ah ama gorgortan siyaasadeed.
