Dowladda Uganda ayaa ku dhawaaqday qorshe ay ciidamadeeda uga baxeyso Soomaaliya, kadib ku dhowaad labaatan sano oo ay ka qeyb ka ahayd howlgalada nabad ilaalinta, taasoo saameyn weyn ku yeelan karta dagaalka lagula jiro Al-Shabaab.
Taliyaha Guud ee Ciidamada Difaaca Uganda, Jen. Muhoozi, ayaa bartiisa X ku sheegay in howlgalka milatari ee Uganda ee Soomaaliya uu si rasmi ah u dhammaaday, isla markaana ay socdaan diyaargarowga ka bixitaan buuxa. “Kadib 19 sano oo aan ku sugneyn Soomaaliya, waxaan qorsheyneynaa inaan si buuxda uga baxno dalkaas waqti dhow,” ayuu yiri, isaga oo aan faahfaahin dheeraad ah ama jadwal cad bixin.
Uganda waxay tan iyo 2007 ka mid ahayd tiirarka ugu waaweyn ee dadaallada nabad ilaalinta Soomaaliya, iyadoo ka qeyb qaadatay dib u riixidda Al-Shabaab iyo dhismaha hay’adaha ammaanka dalka.
Illaa hadda lama shaacin jadwal rasmi ah oo ku saabsan ka bixitaanka, mana jiraan warar ka soo baxay dowladda Soomaaliya ama Midowga Afrika oo ku saabsan sida bixitaanka Uganda loo maareyn doono iyo saameynta uu ku yeelan doono howlgalka AUSSOM iyo amniga dalka, kaas oo weli nugul.
