Guddoomiyaha Hay’adda Maareynta Musiibooyinka Qaranka (SoDMA), Mudane Maxamuud Macalin Cabdulle, ayaa maanta xarunta hay’adda ku qaabilay wafdi sare oo ka socday Plan International, oo uu hoggaaminayay Agaasimaha Gobolka Hoosaadka Bariga Dhexe, Bariga Afrika iyo Koonfurta Afrika, Marwo Angela Muriithi.
Kulanka labada dhinac ayaa diiradda lagu saaray saadaasha abaarta la filayo inay ku dhufato qaar ka mid ah gobollada dalka, kor u qaadista iskaashiga labada hay’adood, iyo xoojinta nidaamyada digniinaha hore iyo jawaabaha degdegga ah ee bulshada.
Mas’uuliyiinta SoDMA iyo Plan International ayaa isla qaatay in la dardargeliyo dadaallada diyaargarowga, la xoojiyo is-weydaarsiga xogaha muhiimka ah, lana ballaariyo faafinta digniinaha hore, si looga hortago saameynta musiibooyinka soo kordhaya.
Sidoo kale, labada hay’adood ayaa ku heshiiyay in la diyaariyo soo-jeedimo cusub oo lagu ballaarinayo iskaashiga, si uu ula jaanqaado mudnaanta qaranka ee maareynta musiibooyinka, loona adkeeyo awoodda bulshada ee u adkeysiga xaaladaha degdegga ah.
Dhinaca kale, masuuliyiinta ayaa hoosta ka xariiqay muhiimada xiriirka istaraatiijiga ah ee u dhexeeya SoDMA iyo Plan International, iyagoo sheegay in wada-shaqeynta joogtada ah ay fure u tahay wax ka qabashada xaaladaha degdegga ah iyo kobcinta adeegyada gurmadka.
