Madaxweynaha Somaliland, Cabdiraxmaan Maxamed Cabdillaahi (Cirro), ayaa magaalada Washington D.C. kulan kula yeeshay Jaaliyadda Somaliland ee ku nool Woqooyiga Ameerika, gaar ahaan Maraykanka, isaga oo ka hadlay xidhiidhka Somaliland iyo Maraykanka iyo natiijooyinka kulamadii diblomaasiyadeed ee uu Washington ku yeeshay.
Madaxweynuhu waxa uu sheegay in kulamadii uu isaga iyo weftigiisu la yeesheen masuuliyiin, xubno ka tirsan Koongarees-ka iyo hay’ado kale oo Washington ku yaalla ay diiradda saareen xidhiidhada, amniga, dhaqaalaha, maalgashiga iyo xaaladda istiraatiijiga ah ee Geeska Afrika, Badda Cas iyo Gacanka Cadmeed.
Waxa uu Jaaliyadda la wadaagay natiijooyinka kulamadaas, isaga oo sheegay in ay ka soo baxeen, sida uu hadalka u dhigay, “niyad-wanaag, kalsooni iyo rajo” ku aaddan xoojinta xidhiidhada, aqoonsiga iyo maalgashiga Somaliland.
Madaxweyne Cirro ayaa sidoo kale uga mahadnaqay Qurba-joogta Somaliland kaalinta ay kaga jiraan dhismaha Somaliland, daryeelka bulshada, maalgashiga iyo kobcinta dhaqaalaha, isaga oo ku boorriyey in ay sii wadaan ka qaybqaadashada arrimaha Somaliland.
Madaxweyne Cirro ayaa sidoo kale sheegay in xukuumaddiisu ay doonayso in ay si nabad ah u xalliso ismaandhaafka beelaha ee ka jira gudaha Somaliland, isaga oo sheegay in uu doonayo in uu si nabad ah Laascaanood ugu soo celiyo gacanta Somaliland.
Kulanka ayaa ka mid ah hawlaha iyo kulamada uu Madaxweynaha Somaliland ku leeyahay Washington D.C., halkaas oo uu maalmihii u dambeeyey kulamo kala duwan kula yeeshay xubno ka tirsan Koongarees-ka Maraykanka iyo hay’ado siyaasadeed iyo cilmi-baadhiseed.
