Madaxweynaha Puntland, Siciid Cabdullaahi Deni, ayaa ku dhawaaqay go’aan siyaasadeed oo cusub oo sii adkeyn kara khilaafka u dhexeeya Puntland iyo Dowladda Federaalka Soomaaliya.
Deni ayaa sheegay in heshiis kasta oo horey u dhexmaray Puntland iyo Dowladda Federaalka Soomaaliya uu hadda yahay mid la laalay, isagoo tilmaamay in Puntland ay si gaar ah u dhaqmi doonto inta laga gaarayo heshiis siyaasadeed oo ay Soomaalidu isku raacdo.
Hadalkan ayaa muujinaya in Puntland ay qaadday mowqif ka sii fog kii hore, iyadoo xoojinaysa aragtideeda ah in arrimaha waaweyn ee dalka lagu xalliyo heshiis siyaasadeed oo ay dhammaan dhinacyadu qayb ka yihiin.
Khilaafka Puntland iyo Dowladda Federaalka ayaa muddooyinkii dambe si gaar ah ugu xoogeystay arrimaha dastuurka, qaabka doorashada iyo awood-qaybsiga dowladda dhexe iyo dowlad-goboleedyada.
Go’aanka cusub ee Deni ayaa kusoo beegmaya xilli ay socdaan dadaallo lagu doonayo in dhinacyada siyaasadda Soomaaliya ay ka gaaraan heshiis ku saabsan doorashada dalka, iyadoo weli ay jiraan kala aragti duwanaansho ku saabsan qaabka iyo jadwalka doorashada.
