Maamulka Koonfur-Galbeed ayaa magacaabay Guddiga Doorashada, tallaabadaas oo lagu sheegay in ay jawaab degdeg ah u tahay warqad kasoo baxday Wasaaradda Arrimaha Gudaha ee Dowladda Federaalka Soomaaliya, taasoo lagu eedeeyay in ay sababtay kala qeybsanaan ku saabsan dadka iyo deegaanada Koonfur-Galbeed.
Warsaxaafadeed kasoo baxay maamulka Koonfur-Galbeed ayaa lagu sheegay in magacaabista guddigan ay qeyb ka tahay dadaallo lagu badbaadinayo hanaanka maamulka, isla markaana lagu xaqiijinayo in ay ka qayb qaataan doorashooyinka dadban ee dalka.
Tallaabadan ayaa u muuqata mid jawaab u ah qorshaha Dowladda Federaalka Soomaaliya ee ku saabsan hirgelinta doorashooyin loo dhan yahay oo ay ku wada jiraan dhammaan heerarka kala duwan ee dalka.
Dowladda Federaalka Soomaaliya ayaa horey u sheegtay in ay ka go’an tahay hirgelinta doorashooyin hufan, loo siman yahay, isla markaana ay ka qayb qaataan dhammaan qaybaha bulshada Soomaaliyeed.
Hase yeeshee, arrintan ayaa imaaneysa xilli ay jiraan khilaafaad siyaasadeed oo la xiriira habka loo wajahayo doorashooyinka guud ee dalka.
