Dowladda Itoobiya ayaa ku eedeysay dalal aysan magacaabin inay caqabad ku yihiin dadaalkeeda ay ku doonayso inay hesho marin badeed, iyadoo ku saleynaysa heshiis iskaashi oo faa’iido leh, sida lagu sheegay war-saxaafadeed dhawaan kasoo baxay Xisbiga Horumarka ee talada haya.
War-saxaafadeedka ayaa lagu sheegay in qorshaha Itoobiya, kaas oo ku dhisan is-dhaafsi iyo dan wadaag, uu wajahayo iska caabin ka timid dhinacyada dibadda.
“Dalalku waxay Itoobiya u arkaan il dhaqaale oo ay ku tiirsan yihiin, iyagoo ku soo roga culaysyo dhaqaale oo aan loo baahnayn,” ayuu ku yiri war-saxaafadeedka Xisbiga Horumarka, isagoo tilmaamaya in dalalka deriska ah ay si ula kac ah u carqaladeynayaan dadaalka Addis Ababa ee ah helidda marin toos ah oo badeed.
Xisbiga ayaa sidoo kale carabka ku adkeeyay muhiimadda ay leedahay in Itoobiya ay hesho marin badeed si toos ah, maadaama ay kaalin muhiim ah ka ciyaarayso ganacsiga iyo koboca dhaqaalaha dalka. Waxaana war-saxaafadeedka lagu sheegay in Addis Ababa ay sii wadi doonto qorsheyaasheeda ku aaddan horumarinta iskaashiga gobolka iyo helidda marin badeed oo ay si madax-bannaan u maamuli karto.
Arrintan ayaa ka dhex muuqata xiisad joogto ah oo ka taagan gobolka, iyadoo Itoobiya oo ah dal aan badda lahayn ay muddo sanado ah raadinaysay marin badeed ay ka hesho dalalka deriska ay la tahay, sida Eritrea iyo Soomaaliya, kuwaasoo diidan qorshaha saldhiga Ciidan iyo la wareegtista dekadahooda.
