Madaxweynaha Mareykanka Donald Trump ayaa sheegay in Mareykanku fuliyay weerar ballaaran oo ka dhan ah dalka Venezuela iyo madaxweyne Nicolás Maduro.
Qoraal uu Trump ku daabacay bartiisa Truth Social ayuu ku sheegay in Madaxweyne Nicolás Maduro iyo xaaskiisa la “qabtay lana saaray diyaarad dalka dibeddiisa u qaadday, kaddib hawlgal uu sheegay in si wadajir ah ay u fuliyeen ciidamada Mareykanka iyo hay’adaha ammaanka ee Mareykanka.
Trump ayaa sidoo kale sheegay in Madaxweynihii Venezuela lagu maxkamadeyn doono gudaha dalka Mareykanka, inkasta oo uusan bixin faahfaahin dheeri ah oo ku saabsan halka lagu hayo ama nooca eedeymaha loo jeedinayo.
Sheegashadan ayaa imaaneysa xilli xiisad culus ay ka dhex taagan tahay Mareykanka iyo Venezuela, kaddib warar sheegaya qaraxyo iyo dhaqdhaqaaq militari oo ka dhacay caasimadda Caracas.
Ilaa iyo hadda, dowladda Venezuela kama aysan hadlin hadalka Trump, sidoo kalena ma jiro wax xaqiijin rasmi ah oo ka yimid hay’adaha Mareykanka ama warbaahinta caalamiga ah oo si madax-bannaan u caddeynaya sheegashadaas.
Wararku weli waa kuwo is khilaafsan, waxaana socda dabagal ku saabsan xaqiiqada hadalkan uu shaaciyay Trump.
