Fahad Yaasiin, Agaasimihii hore ee Ha’ayada Nabadsugida iyo Sirdoonka qaranka Soomaaliya ee NISA ayaa fariintan u direy Madaxweynaha Somaliland Cabdiraxmaan Ciro.
“Mudane Madaxweyne, waxaad og tahay kurisga aad ku fadhido ku dhawaad 20 sano ayaad sugaysay. Alle baa ku gaarsiiyey. Xanta la sheegayo haddii ay run noqoto, waxaad dhaawacaysaa magacaaga iyo taariikhdaada, lamana hubo inaad ku gaarayso danta aad leedahay. Maamulka Somaliland ha usoo jiidin mahadho aan magaceeda ka harin qarniyaal.” Ayuu yiri Fahad Yaasiin oo qoraal soo dhigay barihiisa Bulshada.
Sidoo kale waxaa uu intaasi ku daray “Laga soo bilaabo Madaxweyne Cabdiraxmaan Tuur ilaa Madaxweyne Muuse Biixi, tallaabo aysan ku dhaqaaqin adigu haku dhiiranin. Heshiiskii Muuse Biixi uu badda ugu saxiixay Itoobiya, wuxuu noqon doonaa i qarso, waana la ilaawi doonaa haddaad ku kacdo falka la sheegayo. Madaxweyne Cabdiraxmaan, fadlan, khaladkaan ha galin oo kun jeer ka fiirso.”
“Haddii aad Somaliland aqoonsi u rabto, cad quureed iyo magac xumo ha usoo jiidin dadkaaga iyo Muslimiinta oo idil, adigana magacaaga ha tirtirin. Tallaabada aan ka digayo ciddii la socota unbaa fahmaysa warkayga, laakiin qofkii aanan ogayn, sabab uma noqonayo inaan ka dhigo wax iska caadi ah.” Ayaa markale ku yiri qoraalkiisa.
