Madaxweynaha maamulka Koofur Galbeed Cabdicasiis Xasan Maxamed (Laftagareen) ayaa shaaciyey in Maamulka Koofur Galbeed uu go’aansaday in munaasabaddii dabaal-degga sanad-guurada loo beddelo gurmad gargaar bani’aadamnimo, kadib markii la arkay baaxadda dhibaatada abaarta ka jirta deegaannada kala duwan ee Koofur Galbeed.
Madaxweynaha ayaa sheegay in abaartu ay saameyn xooggan ku yeelatay nolosha dadka iyo xoolaha, isla markaana ay waajib ku tahay hoggaanka iyo bulshada inteeda kale in mudnaanta la siiyo badbaadinta nolosha shacabka ay dhibaatadu saameysay.
“Markaan aragnay dhibaatada abaarta ka jirta deegaannada Koofur Galbeed, waxaan go’aansanay in aan munaasabaddii sanad-guurada u beddelno gurmad gargaar oo aan ku gaarsiinno dadka ay abaartu saameysay,” ayuu yiri Madaxweyne Laftagareen.
Madaxweynaha Koofur Galbeed ayaa ugu baaqay hay’adaha samafalka, ganacsatada, qurba-joogta iyo dhammaan shacabka Soomaaliyeed inay ka qeyb qaataan gurmadka degdegga ah, si loo yareeyo saameynta abaarta iyo dhibaatooyinka ay ku hayso bulshada nugul.
Madaxweynaha ayaa xaqiijiyey in Maamulka Koofur Galbeed uu ka go’an tahay garab istaagga dadka danyarta ah, isla markaana uu sii wadi doono dadaallada lagu badbaadinayo nolosha iyo nolol-maalmeedka shacabka ku nool deegaannada ay abaartu saameysay.
