Madaxweynaha Dowladda Jubaland, Mudane Axmed Maxamed Islaam, ayaa shalay kulan muhiim ah la yeeshay Wakiilka Qaramada Midoobay ee Soomaaliya, James Swan, iyo Safiirka Midowga Yurub ee Soomaaliya, Marwo Francesca Di Mauro.
Kulanka oo ka dhacay magaalada Kismaayo ayaa diiradda lagu saaray xaaladda cakiran ee siyaasadda dalka, iyadoo si gaar ah looga wada hadlay caqabadaha horyaalla geeddi-socodka dowlad-dhiska Soomaaliya iyo sida kor loogu qaadi karo wadashaqeynta u dhexeysa hay’adaha federaalka, dowlad-goboleedyada iyo beesha caalamka.
Madaxweyne Axmed Maxamed Islaam ayaa martida la wadaagay aragtida Dowladda Jubaland ee ku aaddan xallinta khilaafaadka siyaasadeed, muhiimadda ay leedahay in wada-hadal loo maro arrimaha la isku hayo, iyo baahida loo qabo in la dedejiyo geeddi-socod mideysan oo ku dhisan is-afgarad qaran.
Dhankooda, Wakiilka Qaramada Midoobay James Swan iyo Safiirka Midowga Yurub Francesca Di Mauro ayaa adkeeyay taageerada joogtada ah ee Qaramada Midoobay iyo Midowga Yurub ay u hayaan nabadda, xasilloonida iyo dib-u-dhiska hay’adaha dowladeed ee Soomaaliya, iyagoo ku boorriyay dhammaan dhinacyada siyaasadda inay muujiyaan dabacsanaan iyo mas’uuliyad.
Kulanka ayaa sidoo kale lagu falanqeeyay shirka dhawaan la filayo inuu ka qabsoomo magaalada Kismaayo, kaas oo lagu tilmaamay mid fure u ah isu-soo dhowaanshaha dhinacyada siyaasadda iyo dejinta hannaan lagu wajaho caqabadaha jira, si loo xaqiijiyo mustaqbal siyaasadeed oo xasilloon.
