Madasha Samatabixinta Soomaaliyeed ayaa sheegay in ay si kulul u cambaarenayaan xadgudubyada isugu jira handadaad, jir-dil iyo xarig ka dhacay xaafadda Dab-dhamiska ee degmada Wadajir.
“Sida ay Madashu ogaatay, shacabka deegaanka ayaa la kulmay dhibaatooyin kala duwan, iyadoo kuwo badani ku khasbanaadeen in xoog lagaga barakciyo guryahoodii taasoo curyaamisay noloshooda iyo xuquuqdooda aasaasiga ah” ayaa lagu yiri war ay soo saareen.
Madasha ayaa sheegtay in xadgudubyadaas ay yihiin falal lid ku ah dastuurka iyo maamul wanaagga, islamarkaana aan la aqbali karin, waxaana warbixinta Madashu ay ku tilmaantay falka “mid cabasho mudan,” waxayna dalbatay in caddaalad la horkeeno kuwa xadgudubka geystay, laguna beddelo dib u soo celinta guryaha iyo hantidii shacabka laga qaatay.
Sidoo kale, Madasha Samatabixinta Soomaaliyeed waxay ugu baaqday ciidamada ammaanka iyo masuuliyiinta dowladda in ay baaritaan degdeg ah ku sameeyaan dhacdadan, isla markaana laga qaado tallaabooyin sharciga waafaqsan si xaq loogu raadiyo dadka dhiban.
Ugu dambeyn, Madashu waxay mar kale ku celisay baaqeeda ku aaddan madaxda dowladda in ay joojiyaan xadgudubyada noocan oo kale ah, fuliyaan mas’uuliyaddooda ilaalinta xuquuqda shacabka, ayna hubiyaan in hantida iyo amniga dadka rayidka ah si dhab ah loo dhowro.
