Maxkamadda Racfaanka Gobolka Galgaduud ayaa maanta xukun dil toogasho ah ku riday Cabdi Cusmaan Cabdullaahi iyo Gallad Axmed Xuseen, halka Ayuub Maxamed Cabdi lagu xukumay shan sano oo xabsi ah.
Maxkamaddu waxay ku heshay raggan inay ka dambeeyeen dilka hooyo iyo saddex gabdhood oo ay dhashay, fal ka dhacay deegaanka Qaayib ee gobolka Galgaduud.
Xukunka maanta la soo saaray ayaa lagu sheegay in uu yahay mid ka tarjumaya cadaaladda loo raadinayo dhibanayaasha, isla markaana uu farriin u yahay dadka ka fakaraya falalka ka dhan ah nolosha iyo amniga bulshada.
Wararka ayaa sheegaya in xukunka dilka la fulin doono sida sharcigu dhigayo, halka xabsi-sannadeedka Ayuub Maxamed Cabdi uu ka bilaaban doono xarunta xabsiga ee gobolka.
Bulshada deegaanka iyo ehelada dhibanayaasha ayaa warbaahinta u sheegay in ay soo dhoweynayaan go’aanka maxkamadda, iyaga oo ku tilmaamay mid cadaalad ah oo ka jawaabaya fal dambiyeedkii naxdinta lahaa ee ka dhacay Qaayib.
