Booliska Kenya ayaa bilaabay howlgal lagu bartilmaameedsanayo dhalinyarada Soomaaliyeed ee ku sugan magaalada Nairobi, kuwaas oo maalmahii la soo dhaafay kusoo batay inay isku dayaan muuqaallo *challenge* ah oo ay ku duubaan wadooyinka mashquulka badan ee caasimadda.
Howlgalkan ayaa yimid kadib markii ay soo kordheen shilal iyo dhacdooyin naxdin leh oo ay ku dhinteen qaar kamid ah dhalinyarada halka kuwo kalena ay ku dhaawacmeen, xilli ay isku dayayeen inay duubaan muuqaallo ay ugu talagaleen baraha bulshada.
Safiirka Soomaaliya ee Kenya, Jibriil Cabdulle, ayaa horey uga digay khatarta arrintan, isaga oo walaac ka muujiyay badqabka dhalinyarada Soomaaliyeed ee ku nool Nairobi.
Waxa uu baaq u diray dowladda Kenya iyo waalidiinta dhalinyarada si looga hortago dhaqan-gelinta tartamada khatarta ah ee lagu duubo wadooyinka.
Booliska Kenya ayaa sheegay in howlgalkan uu qayb ka yahay dadaalka lagu doonayo in lagu yareeyo khataraha ka dhasha muuqaallada halista ah, isla markaana lagu sugo badqabka dadka isticmaala waddooyinka magaalada.
Ilo amni ayaa sheegay in ciidanku ay qorsheynayaan kor u qaadista wacyigelinta iyo kormeerka, iyadoo dhalinyarada lagu boorinayo inay ka fogaadaan ficillada khatarta badan ee sababi kara dhimasho iyo dhaawac.
