Maamulka Waqooyi Bari ayaa ku eedeeyay maamulka Puntland in ciidamo ka amar qaata Madaxtooyada Puntland ay weerar ku soo qaadeen degmada Boocame ee gobolka Sool, sida lagu sheegay war rasmi ah oo ka soo baxay maamulkaasi.
Warbixinta ayaa sheegtay in iska hor imaad galabta ka dhacay Boocame uu sababay dhaawacyo, iyadoo maamulka Waqooyi Bari uu tilmaamay in ujeedadu ay ahayd “in qalqal amni laga abuuro magaalada Boocame,” sida uu sheegay Guddoomiyaha degmada Boocame, Mahdi Rashaad.
Illaa hadda, maamulka Puntland kama aysan hadlin eedeynta kasoo yeeray Waqooyi Bari. Degmada Boocame ayaa ah meesha uu kasoo jeedo Madaxweyne Ku-xigeenka Puntland, Ilyaas Lugatoor, kaas oo horey u sheegay in degmada ay qayb ka tahay Puntland.
Sidoo kale, Puntland ayaa horey uga hor istaagtay in degmada Boocame, oo ku taal 70 km u jirta Garowe, ay ka dhacdo diiwaangelinta doorashooyinka qof iyo cod ee ay Dowladda Federaalka Soomaaliya ka wadday deegaannada Waqooyi Bari.
Wararka ayaa muujinaya xiisad sii kordheysa oo ka taagan xeerarka xuduudaha Puntland iyo Waqooyi Bari, taas oo khatar ku keeni karta amniga guud ee gobolka Sool.
