War rasmi ah oo kasoo baxay Ciidanka Booliska Maamulka Waqooyi Bari ayaa lagu sheegay in ciidanka Booliska ee degmada Laascaanood ay xalay, abaaro 1:30 habeenimo, howlgalkii ay ku baadi goobayeen eedeysanaha Cawil Cumar Ganey, oo lagu eedeeyay inuu ka gaystay fal kufsi agagaarka degmada Laascaanood, ugu dambeyntii gacanta ku soo dhigeen.
Saraakiisha Booliska ayaa xaqiijiyay in Cawil Cumar Ganey uu muddo toddobaad ah ku jiray raadinta ciidamada, kuwaas oo si qorshaysan ugu fuliyay howlgalka qaybta dambi-baarista ee degmada Laascaanood.
Boolisku waxay ku booriyeen bulshada inay ka qayb qaataan dagaalka lagula jiro dambiyada, gaar ahaan kuwa kufsiga iyo amni-darrada, isla markaana ay la shaqeeyaan laamaha amniga.
Waxa kale oo ay bulshada ugu baaqeen in si degdeg ah loo soo sheego cid kasta oo lagu tuhmo falalka noocan ah, si loo xaqiijiyo amniga iyo nabadgelyada bulshada.
