Wasiiru Dawlaha Arrimaha Dibadda Itoobiya Hadera Abera, ayaa si weyn uga hadlay taageerada joogtada ah ee dowladiisa u fidinayso nabadda iyo xasiloonida Soomaaliya, intii lagu guda jiray Shirweynihii Heer Sare ee Lacag-ururinta ee Howlgalka Midowga Afrika ee Taageerada iyo Xasilinta Soomaaliya (AUSSOM), kaasoo ka dhacay xilligii Golaha Guud ee Qaramada Midoobay ee 80aad.
Hadera ayaa sheegay, “Waxaan gaarnay horumar la taaban karo oo ku saabsan wiiqista awoodda Al-Shabaab. Arrintan waxaan xusuusinayaa ciidamadeenna, gaar ahaan kuwii ku dhintay hawsha qaran.”
Wuxuuna bogaadiyay horumarka ay dowladdu ka samaysay xoojinta awoodda ciidamada difaaca iyo amniga qaranka Soomaaliya.
Sidoo kale, Wasiirka ayaa carabka ku adkeeyay baahida degdegga ah ee dhaqaale ee AUSSOM oo gaaraysa ku dhawaad 180 milyan oo doollar oo loo baahan yahay sanadka 2025.
Wasiiru Dawlaha Itoobiya ayaa sidoo kale sheegay in dhisidda awooda amniga qaranka Soomaaliya ay tahay jidka ugu waara ee lagu gaari karo xasiloonida. Wuxuu ku baaqay inay jiraan go’aan siyaasadeed oo cusub iyo taageero isku dhafan oo looga baahan yahay in Soomaaliya looga dhigo dal ammaan ah oo barwaaqo ah.
