Musharaxiinta Mucaaradka Waqooyi Bari oo Dowladda Federaalka ku eedeeyay faragelin iyo taageerada musharax gaar ah

Musharaxiinta mucaaradka ee maamulka Waqooyi Bari Soomaaliya ayaa ku eedeeyay Dowladda Federaalka Soomaaliya inay lumisay doorkeedii dhex-dhexaadnimo ee doorashada, iyagoo ku eedeeyay inay si cad ula safatay uguna ololeynayso musharax Cabdiqaadir Firdhiye, oo horey u ahaa hoggaamiyihii maamulka ku-meelgaarka ah ee SSC-Khaatumo.

Waxay sidoo kale ku eedeeyeen Dowladda Federaalka inay leedahay dano gaar ah oo halis gelin kara hufnaanta doorashada. Xubin kamid ah musharaxiinta oo la hadlay HOL ayaa sheegay in dowladda ay dhaqaale xooggan soo  galisay magaalada Laascaanood, si loogu laaluusho xildhibaanada si ay ugu codeeyaan musharaxa ay taageerayso dowladdu.

Qaar ka mid ah musharaxiinta ayaa sheegay,  in tan iyo bilowgii dhismaha maamulka cusub ay dowladda wadday faragelin ka dhan ah madax-bannaanida shirweynaha iyo nidaamka wax-qeybsiga beelaha, balse ay arrintaas uga tanaasuleen baahida loo qabo dhismaha maamulka.

Hadalka musharaxiinta ayaa imaanaya xilli doorashada hoggaanka maamulka Waqooyi Bari Soomaaliya ay si rasmi ah u bilaabanayso saacadaha soo socda, iyadoo ilaa 10 musharax ay ku tartamayaan jagada madaxweynaha iyo ku xigeenkiisa.