Madaxweynaha dowladda Federaalka Soomaaliya Xasan Sheekh Maxamuud ayaa xarunta Madaxtooyada dalka ku qaabilay Wasiirka arrimaha dibadda ee dalka Jabuuti Cabdulqaadir Xuseen Cumar iyo wafdi uu hoggaaminayay.
Kulanka dhexnaray madaxweyne Xasan Sheekh iyo wafdiga Wasiirka arrimaha dibadda dalka Jabuuti ayaa looga arinsaday in labada dhinac sii xoojiyaan xiriirka istaraatiijiga ah ee Soomaaliya iyo Jabuuti ka dhexeeya ee ku dhisan walaaltinimo iyo iskaashi qotodheer, gaar ahaan dhinacyada amniga, iyo arrimaha gobolka.
Wasiirka arrimaha dibadda dowlada Jabuuti ayaa sidoo kale madaxwaynaha Soomaaliya Xasan Sheekh Maxamuud soo gaarsiiyay salaan iyo dhambaal uu kaga siday dhigiisa Madaxweynaha dowladda Jabuuti Ismaaciil Cumar Geelle.
“Intii uu kulanka socday, Madaxweyne Xasan Sheekh Maxamuud ayaa Wasiirka la wadaagay xaaladda guud ee dalka, gaar ahaan dadaallada socda ee dib u dhiska, horumarinta iyo howlgallada lagu ciribtirayo Khawaarijta Daacish iyo Al-Shabaab, isaga oo uga mahadceliyay shacabka iyo Dowladda Jabuuti hiilka walaalnimo ee ay la garabtaagan yihiin walaalahooda Soomaaliyeed” ayaa lagu yiri qoraal kasoo baxay Madaxtooyada Soomaaliya.
Wasiirka arrimaha dibadda ee dalka Jabuuti Cabdulqaadir Xuseen Cumar ayaa dhankiisa si weyn uga mahadceliyey soo dhoweynta walaalnimadu ku dheehan tahay ee isaga iyo wafdigiisa loogu sameeyey Muqdisho, taasoo aheyd booqashadiisi ugu horey tan iyo markii xilkaan loo magacaabay bishii April ee sanadkan 2025.
