Xubnihii mucaaradka ahaa ee dhawaan isaga baxay Golaha Samatabixinta oo kala ah Cumar C/rashiid Cali Sharmaake, Maxamed Mursal C/raxman, Shariif Xasan Sheekh Aadan iyo Daahir Geele Maxamuud ayaa maanta lagu wadaa in kulan la yeeshaan wakiillada Beesha Caalamka ee ku sugan magaalada Muqdisho.
Kulanka ayaa filayo in uu noqon doona mid si dhow loogu eegayo mustaqbalka siyaasadda Soomaaliya, gaar ahaan arrimaha doorashooyinka soo socda.
Kulankan ayaa imaanaya saacado kaddib markii shalay ay Xubnahaan ay gaareen heshiis siyaasadeed oo rasmi ah oo ay la galeen Dowladda Federaalka Soomaaliya, heshiiskaas oo dib loogu noqonayo hannaankii hore ee doorashooyinka Teendhada lagu maamuli jiray.
Heshiiskan ayaa siyaasadda dalka ee Xiligaan ku soo kordhiyey wajigii ugu cuslaa, iyadoo ay jiraan siyaasiyiin weli ku haray Madasha Mucaaradka oo si cad uga soo horjeeda qodobadii lagu heshiiyey.
Arrintan ayaa kusii sii xoogeysatay kala aragti duwanaanta mucaaradka dhexdiisa, xilli dowladda federaalkuna ku tilmaantay tallaabadan mid ka tarjumaysa midnimo iyo wada shaqeyn siyaasadeed oo gudaha ah.
Xubnaha mucaaradka ee heshiiska qaatay ayaa ku adkaystay in tallaabadan ay muujinayso rabitaankooda ku aaddan in dalka lagu hoggaamiyo nidaam furan oo siyaasadeed, halka mucaaradka kale ee weli diidan ay ku doodayaan in heshiisku yahay marin habaabin dib loogu celinayo habkii la isku hayey ee doorashooyinka.
