Taliye Xuseen Giif oo Lagu Dilay dagaal Ka Dhacay Tuulo Amiin ee Gobolka Gedo

Taliye sare oo ka tirsan booliska Jubaland ayaa la xaqiijiyay inuu ku dhintay Dagaal culus oo aroornimadii maanta oo Isniin ah ka dhacay saldhig ciidan oo ku yaalla tuulada Tuulo Amiin ee gobolka Gedo, sida ay sheegeen ilo-wareedyo deegaanka iyo saraakiil amni.

Weerarka oo loo arkay mid si fiican loo qorsheeyay ayaa waxaa fuliyay ciidamo ka tirsan dowladda federaalka Soomaaliya oo uu hoggaaminayay Abdirashiid Janan, taliyaha cusub ee Hay’adda Sirdoonka iyo Nabad Sugidda Qaranka (NISA) ee gobolka Gedo.

Wararka ayaa intaa ku daraya in sidoo kale ay jiraan askar ka tirsan Jubaland oo ku dhintay ama ku dhaawacmay weerarka, iyadoo ciidamadii weerarka qaaday ay la wareegeen hub iyo gaadiid dagaal oo yaallay saldhigga waxaana ay soo bandhigeen ciidamo nolosha ay ku qabteen.

Wasiirka Wasaaradda Amniga Gudaha Jubbaland ayaa xaqiijiyay dhimashada Taliyaha, Xuseen Wali Ali (Xuseen Giif), oo ahaa Taliye Ku-xigeenkii Ciidanka Booliska Jubbaland isagoo shacabka Jubaland iyo qoyskiisa uga tacsiyadeeyay Geeridiisa.

Wasiirka ayaa sheegay inay si kulul u cambaareenayaan fal uu ku tilmaamay mid fool xun oo taliyaha lagula dhaqaaqay, kaas uu dusha kaga tuuray inay ka dambeeyeen ciidamada Dowladda waxaana uu ku baaqay in cadaaladda la horkeeno cid kasta oo ku lug leh weerarkaasi.

Dowladda federaalka Soomaaliya kama aysan bixin wax war ah oo rasmi ah ilaa hadda ku saabsan howlgalka, waxaana la filayaa in faahfaahin dheeri ah laga bixiyo saacadaha soo socda.