Shacabka degmada Baladxaawo ee gobolka Gedo ayaa maanta dhigay bannaanbax ballaaran oo ay uga soo horjeedaan amar dhowaan kasoo baxay ciidamada Itoobiya ee ku sugan gobolkaas. Amar-kan ayaa ahaa mid lagu farayo in ciidamada dowladda Soomaaliya ee uu hoggaamiyo Cabdirashiid Janan ay isaga baxaan degmada Baladxaawo.
Bannaanbaxayaasha oo isugu jiray dadweyne kala duwan, ayaa ku dhawaaqayay ereyo ay ku muujinayaan taageeradooda ciidamada dowladda, iyagoo sidoo kale cambaareeyay faragelinta ciidamada Itoobiya.
Dad badan ayaa u arka amarka Itoobiya mid wiiqaya madax-bannaanida Soomaaliya, gaar ahaan xilligan dalka uu wajahayo xaalado amni iyo siyaasadeed oo adag.
Ciidamada Itoobiya ayaa ku wajahan Magaalada Beledxaawo.
Waxaa la filayaa in madaxda dowladda Soomaaliya ay ka hadlaan arrintan, iyadoo ay sii xoogeysanayaan dareen-celinta shacabka iyo walaaca laga qabo doorka ciidamada Itoobiya ee ku sugan gudaha Soomaaliya.
