Xiisad siyaasadeed oo xooggan ayaa ka taagan xeebaha Puntland kaddib markii maamulka goboleedkaasi uu qabtay markab xamuul ah oo laga leeyahay dalka Comoros, kaasoo sida hub ay leedahay dowladda Turkiga.
Markabkan oo lagu magacaabo Sea World ayaa la qabtay 18-kii bishan Luulyo, iyadoo dowladda Puntland ay sheegtay inay baaritaan ku waddo milkiyadda dhabta ah ee qalabka milatari ee saaran markabka.
Dhinaca kale, Puntland ayaa sheegtay in markabka Sea World, oo la dhisay 1977 una qaadi kara ilaa 13,000 tan, uu laba maalmood ku sugnaa meel aan caadi ahayn oo u dhow xeebta, taasoo keentay tuhun. Maamulka Puntland ayaa sheegay in markabka lagu qabtay xog sirdoon oo ku saabsan in qalab milatari sharci-darro ah saarnaa, kadibna loo soo jiiday deked si baaritaan loo sameeyo.
Bayaan ay maanta, 24-kii Luulyo, soo saartay Puntland ayay ku sheegtay in xaaladdu ay “shaki weyn galisay cidda dhabta ah ee leh xamuulka saaran markabka.” Sawirro lagu baahiyay baraha bulshada ayaa muujinaya gaadiid dagaal iyo qalab ciidan oo saaran markabka, halka wararka dowladda federaalka ay sheegayaan in qalabkaas uu sharci yahay isla markaana loogu talagalay xarunta tababarka milatari ee TURKSOM ee ay Turkigu ka maamulaan Muqdisho.
Afhayeen u hadlay Puntland ayaa sheegay, “Dowladda Puntland waxay sii waddaa baaritaanka ku saabsan markabka iyo milkiyadda dhabta ah ee hubka saaran, si loo hubiyo in qalabkan ciidan uusan gacanta ugu dhicin cid wax u dhimaysa amniga iyo xasilloonida Soomaaliya.”
Arrintan ayaa lagu tilmaamay mid kasii daraysa xiriirka xumaaday ee u dhexeeya Puntland iyo dowladda dhexe, waxaana falanqeeyayaal siyaasadeed ay rumeysan yihiin in dhacdadani ay leedahay saldhig siyaasadeed.
