Baraha bulshada, gaar ahaan madalaha sida X (hore Twitter), ayaa si xooggan looga dhaleeceeyay siyaasadda madaxweynaha Donald Trump ee ku aaddan kordhinta howlgalada militari ee Soomaaliya.
Madaxweyne Trump ayaa lagu eedeeyay inuu ka leexday ballanqaadkiisii ololaha doorashada oo ahaa inuu joojinayo dagaalada aan dhammaadka lahayn, isaga oo si weyn u kordhiyay duqeymaha cirka ee Mareykanka ka fuliyo Soomaaliya iyo dalal kale.
“Kororka weerarada cirka ee ka socda Soomaaliya ayaa si toos ah uga hor imaanaya ballanqaadyadii Trump ee ahaa in Mareykanka laga saaro dagaalada daba dheeraaday,” ayaa lagu yiri qoraallo cambaarayn ah oo lagu faafiyay baraha Internetka.
Dowladda Federaalka Soomaaliya ayaa si diiran u soo dhaweysay taageerada Mareykanka ee la dagaalanka kooxaha argigixisada ee Al-Shabaab iyo Daacish, hase yeeshee tirada sii kordheysa ee weerarada ayaa weli ka dhalisay walaac caalami ah.
Khubaro ka tirsan Atlantic Council oo hay’ad cilmi-baariseed oo dhiirrigelisa hoggaaminta Mareykanka ee arrimaha caalamiga ah, ayaa digniin ka bixiyay in xalka Soomaaliya uusan ku koobnayn oo keliya dagaal militari, balse uu u baahan yahay in la xalliyo dhibaatooyinka bulsho iyo dhaqaale ee asalka u ah xasaradaha.
Inkastoo Mareykanka uu xoojinayo dadaalladiisa la dagaalanka argagixisada Soomaaliya, haddana lama hubo in kordhinta weerarada cirka ay keeni doonaan guulo muuqda.
