Ra’iisul Wasaaraha Xukuumadda Federaalka Soomaaliya, Xamsa Cabdi Barre, oo ka qeyb galay Shir-Cilmiyeedka 3-aad ee Madasha Horumarinta Bariga Afrika, ayaa sheegay in Qaran-dhiska nuxurkiisu yahay xoojinta hey’adaha, kor u qaadista wacyiga bulshada iyo qorsheyaal cad cad oo ka tarjumaya halka dalka loo jiheynayo.
Ra’iisul Wasaare Xamsa, ayaa sheegay in dalkeenna loo jiheeyay dhanka horumarka iyada oo lagu salaynayo cilmi baarisyo lagu qeexay Qorshaha Isbeddelka Qaranka, iyo Qorshaha Hiigsiga 2060 ee la doonayo in horumar muuqda lagu gaarsiiyo dalkeenna.
“Dowladda Soomaaliyeed waxa ay la timid aragti Qaran oo ku saleysan Cilmi-baarisyo waaweyn oo lagu saleeyay Qorshaha Qaranka ee sannadaha soo socda, sidaas darteed Aqoonyahanka iyo Haldoorka Soomaaliyeed waxaa looga baahan yahay in ay qeyb ka noqdaan sahanka u maqan dalkeenna iyo halka aynu berri degi doonno” Ayuu yiri Ra’iisul Wasaaruhu.
Sidoo kale Ra’iisul Wasaaraha Soomaaliya ayaa si adag uga hadlay ujeedada dhabta ah ee nidaamka federaalka, isagoo tilmaamay in federaalku uusan ahayn in uu shacabka Soomaaliyeed kala qeybiyo ama uu noqdo albaab laga soo galo si shisheeyuhu u farageliyo arrimaheena gudaha.
“Federaalku looma keenin in uu kala dhax dhigo ummadda Soomaaliyeed. Ma ahayn in uu noqdo albaab laga soo galo si faragelin shisheeye loo suurtageliyo. Federaalku waa nidaam loo qaabeeyay in uu mideeyo, cadaaladna dhaliyo,” ayuu yiri Ra’iisul Wasaaraha.
Hadalka Ra’iisul Wasaaraha ayaa imaanaya xilli ay taagan tahay dood xooggan oo ku saabsan xiriirka Dowladda Federaalka iyo Dowlad Goboleedyada, iyadoo mararka qaar uu jiro is-maandhaaf saameynaya dadaallada dhismaha dowladnimada Soomaaliya.
