Siyaasiyiinta Madasha Mucaaradka ee uu hoggaamiyo madaxweynihii hore Shariif Sheekh Axmed ayaa maanta shir xasaasi ah uga socdaa magaalada Muqdisho.
Shirkan ayaa imaanaya iyadoo la filayo in maalinta berri ah kulankii labaad la yeeshaan Madaxweynaha Dowlada Federaalka Soomaaliya Xasan Sheekh Maxamuud oo 25-kii bishii June uu dhex maray kulankii ugu horeeyay.
Shirka Madasha mucaaradka ayaa waxaa looga doodayaa qodobadii ay la hortegi lahaayeen kulan ay la leeyihiin Madaxweyne Xasan Sheekh Maxamuud.
Warar aanu ka helnay xubno ka mida Madasha Mucaaradka ayaa sheegaya in kulanka maanta ay ku diyaariyaan in si rasmi ah loo guda galo qodobadda muhiimka ah ee La isku hayo.
Kulankii hordhaca ayaa la isku afgartay ajande ka kooban afar qodob, balse waxaa Ugu muhiimsan labada qodob ee kala ah:
1. Wax ka bedelka Dastuurka oo madaxweynuhu ogolaaday in laga wadahadlo.
2. Iyo Hannaanka Doorashooyinka oo La raadinayo Doorasho heshiis lagu yahay.
Wadahadalka labada dhinac waxaa saameyn ku leh Arrin muhiimka oo madaxweyne Xasan Sheekh u xilsaaray Mucaaradka, taasoo ah inay La xiriiraan, wadahadalkana kusoo daraan maamul Goboleedyada maqan ee Puntland iyo Jubbaland.
Xogtii ugu danbeysay ayaa sheegeysa inay xiriiro dhex mareen madaxda Mucaradka, Siciid Deni iyo Axmed Madoobe, isla markaana ay labada madaxweyne ee Puntland iyo Jubbaland shuruudo ku xireen wadahadalka Madaxweyne Xasan Sheekh.
Kulanka labaad ee la filayo inay Berri yeeshaan Madasha mucaaradka iyo Madaxweyne Xasan Sheekh Maxamuud Sheekh ayaa noqonaya kii ugu adkaa ee labada dhinac dood toos ah ka yeeshaan qodobadda la isku khilaafsan yahay.
Guddi farsamo oo labada dhinac ah ayaa la filayaa in la sameeyo, kaasoo ay kulankii hore ay diideen Mucaaradka.
